قصائد قبل الثورة للشاعر: ناصر صلاح
قصيدة مبايعة (مارس ٢٠٠٥ ) ناصر صلاح
ابعدوا عنه وسيبوه
هو ناقص ضغطكوا.. هتموتوه
يعني فاضل كام في عمره.. سننوه
زي ابوكم.. زي جدي.. فوّتوا واتحملوه
ليه يا عالم في النهايه بتحرجوه
@@@
خد علينا وخال علينا.. فاعذروه
نفسه يرأس فتره ساتَّه.. رقصوه
والله ضفره ما هتجيبوه
دا السلام والحرب هوه.. تنكروه
عمركم ما تعوضوه
عاوز ابنه يجي بعده.. بَعدوه
ما الولد طالع لابوه
وانتوا شايفين اليهود والأمريكان
زهقوا منه وحطوا خطه يغيروه
نفسهم طرطور جديد.. ويترتروه
هو منكم.. مهما جار دايما عليكم.. أيدوه
ما انتوا صابرين ربع قرن
ربع تاني وبالجمايل حملوه
ما انتوا من يوم ما اتولد.. بتعشموه
ليه يا عالم في النهايه بتحرجوه
مش كفايه إن حلمه
يعمل أحمد فيلم عنه
مات وماتحققش منه.. حتى مشهد ... ارحموه